「东」隅已逝,桑榆非晚

2017-10-12 20:08 来源:网络整理

photo_742399.jpg
塞尔特人今季真正有力叫板骑士。 如今正值NBA季前赛嘅尾声,意味著常规赛即将开打,北京时间10月18号早上,NBA揭幕战将隆重打响,巧合嘅系,呢个夏天进行咗一笔大交易嘅两支球队骑士同塞尔特人将会针锋相对。讲起夏季嘅交易市场,俗语就话一江春水向「东」流,但宜家联盟嘅方向嚟睇就啱啱好相反,春水基本都向「西」流,多支球队决定重建,下面嚟讲下新球季东岸嘅形势。

经过呢个夏天交易市场嘅一连串大动荡之后,东岸嘅形势相当分明,骑士同塞尔特人将系东岸嘅第一集团,讲到最大动作嘅莫过于系塞尔特人,球队今季基本上面目全非,旧有拼图就得返贺福特同埋史马特喺度,不过不断补强嘅佢哋宜家已经具备争冠实力,如无意外正选五虎将由K.艾荣积伦布朗G.夏禾特马古斯摩里士以及贺福特组成,这套阵容绝对比上季I.汤马士单兵带领嘅塞尔特人要强得多,而G.夏禾特则成为最醒目嘅一位球星,喺人强马壮嘅西岸游走到强弱悬殊嘅东岸,对于个人嘅总冠军目标又迈进一大步。不过要动用J.高达I.汤马士去换咗K.艾荣返嚟,呢笔交易睇上去或多或少会觉得塞尔特人有啲大平卖嘅感觉,但系细心观察一下就会发现,骑士嘅阵容强咗,但稳定性差咗。

卓斯坦汤臣上季开始沉迷儿女私情,正所谓红颜祸水,骑士内线将更加倚重奇云拿夫,就睇佢可唔可以打返木狼时期嘅水准。其次就系控卫位置上,虽然有I.汤马士同前MVP戴历克罗斯两位新援,但前者嘅玻璃体质对于骑士嚟讲绝对系一个赌博式,并且已经唔止试过一次喺关键时刻受伤,加上复出之后或多或少会带住情绪上班(如今对塞尔特人依旧眷恋);后者则自从大伤之后,就好似内功尽失咁,可以打出以前五成功力已经算交到功课。或者最令人欣喜嘅系大家可以再一次睇到「占」「华」嘅合作,勒邦占士喺热火时期同华迪已经Friend过夹band,再次合作相信系一众「占」迷最想见到嘅事情。领军人物勒邦占士自2011年起每年嘅总决赛都见到佢嘅身影,今季面对塞尔特人嘅壮大,加上K.艾荣呢位前队友嘅「挑拨」,勒邦占士嘅球队要一帆风顺就唔可以好似以前咁放松。

鹰队、溜马、公牛今夏都步入重建,新赛季呢几支球队会系点相信大家都心中有数,不过东岸嘅第二集团实力都唔弱,巫师创建咗史上第一支3个亿元先生嘅球队,不过佢哋嘅后备同埋内线实力就有待商榷,但系宜家东岸整体实力都偏弱,又好难怪J.禾尔会叫板东岸第一控卫嘅。「字母哥」阿迪图昆保带领嘅公鹿同埋呢几年低调又稳阵嘅速龙都不容小觑,呢两支球队基本保留近年嚟嘅班底,稳定性不言而喻,佢哋绝对有能力成为黑马,不过要令到塞尔特人同埋骑士阴沟翻船仲系有啲难度。

而黄蜂和活塞仅位列中游,佢哋嘅实力顶多都系争夺下季后赛资格。篮网、纽约人呢一类嘅球队就唔洗讲,喺佢哋身上根本睇唔到季后赛嘅希望。最后值得一提嘅系七十六人呢班波,佢哋呢几年囤积唔少潜力十足嘅球员,加上今夏又招入部分老兵嚟带一带班后生仔,只要呢班波保持健康嘅状态,佢哋好有希望带嚟惊喜。