撇除藍月亮 敲和波6串50

2017-10-21 18:39 来源:网络整理

英超開季至今,「藍月亮」曼城主帥哥迪奧拿高舉進攻足球大旗,連場大捷氣勢如虹,令一眾列強聞風喪膽,買佢哋W嘅賠率亦相當乏味,既然周六冇乜特別強勁戲碼,撇除曼城對般尼之役,不如將其餘6仗,整條和波過關6串50,每注10元,6串50係唔要單頭、過5關及6關,只有過2、3及4關,中到2至3場都幾和味。

言歸正傳,雖然利物浦聽晚先至作客硬撼熱刺,但呢支老牌勁旅實在係海鮮波,都唔知佢哋幾時嚟料,早排試過連續3仗打和,周中歐聯忽然狂數馬里博爾7粒,飄忽到估佢唔到,博彩者見到紅軍真係頭都痕埋,就算死忠粉絲亦擰擰頭。一來紅軍後防堅唔穩陣,二來主帥高普嘅高強度壓迫打法時好時壞,要有足夠體力持續成季都交到貨,確有難度,佢哋8場聯賽失咗12粒,其同市死敵愛華頓亦8仗失咗13粒,可謂同病相憐,場均失超過1球,喺講求穩定嘅聯賽點樣爭冠呢?雖然好多領隊都崇尚進攻足球,但除非你隊波擁有早幾年西班牙國家隊或巴塞隆拿嗰類技術出眾嘅球星,兼且理念一致、分工鮮明,否則筆者建議佢哋面對現實打番穩守突擊,所以見到利物浦出場不宜賭博,寧願睇波算數。